Inomjon Azimov: O‘zbekiston va Ozarbayjon munosabatlari eng yuqori darajada
Professor Inomjon Azimov Boku shahriga tashrifi, xalqaro konferensiyadagi ishtiroki va ilmiy hamkorlikning asosiy yo‘nalishlari haqida so‘zlab berdi. Shuningdek, u O‘zbekiston va Ozarbayjon o‘rtasidagi munosabatlarning bugungi holatini baholadi.
7–8-aprel kunlari Baku shahrida, Boku Slavyan universitetida I Turkologik qurultoyning 100 yilligiga bag‘ishlangan xalqaro konferensiya tashkil etildi. Unda o‘zbek olimi, professor Inomjon Azimov ham ishtirok etdi. Biz undan ushbu tadbir doirasidagi asosiy voqealar hamda ikki tomonlama munosabatlar rivoji haqida so‘radik.
— Boku shahriga tashrifingiz va konferensiya doirasidagi uchrashuvlar haqida batafsil aytib bersangiz.
— Ma’lumki, 1926-yilda Bokuda I Turkologik qurultoy bo‘lib o‘tgan bo‘lib, unda barcha turkiy xalqlar vakillari hamda xorijiy olimlar qatnashgan. Qurultoyda turkiy xalqlarning tili, adabiyoti, tarixi va etnografiyasiga oid muhim masalalar muhokama qilingan.
Mazkur voqeaning 100 yilligi munosabati bilan Ozarbayjon Prezidenti tomonidan uni keng nishonlash to‘g‘risida qaror qabul qilindi. Aprel boshida Bokudagi Slavyan universitetida turli davlatlardan, jumladan O‘zbekistondan olimlar taklif etilgan xalqaro konferensiya tashkil etildi. Muhokamalarda umumturkiy til, alifbo va til siyosati, turkiy tillar terminologiyasi hamda zamonaviy muammolar va tendensiyalar ko‘rib chiqildi.
Majlislar tilshunoslik bo‘yicha beshta va adabiyotshunoslik bo‘yicha bitta seksiyada o‘tkazildi. Men seksiyalardan birida moderator sifatida qatnashdim va “I Turkologik qurultoyda yozuv birligi g‘oyasi” mavzusida ma’ruza qildim.
Shuningdek, qurultoy doirasida ilgari o‘tkazilgan 17 ta majlisning stenografik hisoboti alohida kitob sifatida nashr etilgan. Mening rahbarligimda ushbu kitob o‘zbek tiliga tarjima qilinib, chop etildi.
Mazkur tadbir turli mamlakatlardan kelgan tadqiqotchilar o‘rtasida ilmiy muloqot va fikr almashish uchun muhim maydon bo‘ldi.
— Umuman olganda, Ozarbayjon va O‘zbekiston o‘rtasidagi munosabatlarning bugungi holatini qanday baholaysiz?
— Menimcha, O‘zbekiston va Ozarbayjon o‘rtasidagi munosabatlar eng yuqori darajada. Xalqaro maydonda O‘zbekiston doimo Ozarbayjonning hududiy yaxlitligini qo‘llab-quvvatlab keladi. Ayniqsa, Shavkat Mirziyoyev hokimiyatga kelganidan so‘ng hamkorlik yanada mustahkamlandi.
Qorabog‘ urushi davrida O‘zbekiston Ozarbayjon pozitsiyasini ochiq qo‘llab-quvvatladi. Urushdan so‘ng mamlakat ozod etilgan hududlarni tiklashda faol ishtirok etdi. Jumladan, Fuzuli shahrida Mirzo Ulug‘bek nomidagi 1-sonli umumta’lim maktabi qurildi.
— Ikki davlat o‘rtasidagi hamkorlikning qaysi yo‘nalishlarini eng istiqbolli deb hisoblaysiz?
— Ikki mamlakat o‘rtasidagi tovar ayirboshlash hajmi yildan yilga ortib bormoqda. Asosiy yo‘nalishlar sifatida energetika (neft va gaz), transport va logistika, qishloq xo‘jaligi hamda to‘qimachilik sanoatini ko‘rsatish mumkin.
Alohida ahamiyatga ega loyiha — Transkapiy xalqaro yo‘li bo‘lib, u mintaqaviy aloqalarni rivojlantirishda muhim rol o‘ynaydi.
Bundan tashqari, madaniy va ta’lim sohasidagi aloqalar ham faol rivojlanmoqda: talabalar almashinuvi dasturlari amalga oshirilmoqda, ilmiy konferensiyalar va madaniy tadbirlar o‘tkazilmoqda.
Kelajak istiqbollariga kelsak, O‘zbekiston va Ozarbayjon o‘rtasidagi hamkorlik yanada kengayib, chuqurlashib boradi deb hisoblayman. Bu nafaqat iqtisodiy, balki madaniy-gumanitar sohalarni ham qamrab oladi. Ishonchim komilki, yaqin yillarda mamlakatlarimiz strategik sheriklikni yanada mustahkamlab, yangi qo‘shma loyihalarni amalga oshiradi.
Aysel Zeynalova suhbatlashdi.